立法會選舉之前，中方勢力挖揭民主派嘅種種「醜聞」，抹黑謾罵，不擇手段。點知真正嘅醜聞，係喺投票之時嘅選舉行政大混亂，醜聞嘅主角就係平時「主持正義」，道貌岸然嘅大法官胡國興。
屯門、小西灣、將軍澳、港島多個投票站，都出現神秘封箱、驅逐政黨代理人嘅黑箱真空政治事件，三大功能組別嘅三名候選人，包括社福界張國柱、會計界陳茂波及有「政界關之琳」之稱嘅女藥劑師兼傳媒紅人龐愛蘭，紛紛指斥選舉事務委員會，指出收回嘅票數竟然多過發出嘅選票，唔知發生咗乜事！
藥劑師都話大劑，會計師都話條數唔清唔楚，功能組別得嗰區區幾百票，咁都一盤爛數，一塌胡塗，港島區、九龍東、新界西，選票郁吓三幾十萬，頻頻出現黑箱真空政治醜聞，遭到在場監督嘅專家大事抨擊，裏面有幾多蠱惑，可想而知！
大狀湯家驊親眼目睹，喺將軍澳，啲選票倒咗出嚟好似啲舊報紙咁隨處放，冇人理會，任啲風吹起，簡直係有如玩泥沙！