【本報訊】有車牌唔代表識揸車，亦都唔代表有常識，好似觀塘呢位司機咁，將架車停咗喺馬路中間走咗去，留低車上嘅BB同小童，最後仲驚動埋阿Sir到場。
話說星期日（22號）晚7點幾，一架黑色私家車喺觀塘開源道行駛途中，突然停喺觀塘廣場對開馬路中心，個司機好急咁衝咗落車後冇咗影，車廂仲留低咗BB同小童。

一時稱「冇油」

市民周先生當時喺現場，見個男司機匆匆落車衝入商場內嘅港鐵站，一去就去咗差唔多20分鐘，之後見佢喺港鐵站落返嚟，其間有途人報警，警察趕到了解，見司機返咗嚟，咁阿Sir梗係問吓佢搞咩、去咗邊啦，大家估吓個司機答咩？
周先生話聽到個司機對答，初時同阿Sir講話「急屎」，所以先突然停低部車喺馬路中心，趕去搵廁所咁話。你儍箒，阿Sir會同你一齊儍咩？司機又改口話：「架車冇油，去咗買油返嚟入油。」仲攞住支嘢畀阿Sir睇，相信係油嚟。講到咁，阿Sir都冇符，最後抄低司機嘅資料，訓示咗佢一番就畀佢開車走，司機同阿Sir做晒sorry手勢，就揸番部車慢慢開走。
警方表示，周日傍晚6時許接報後，警員到場調查，60歲姓劉司機表示汽車冇汽油，於是停車去油站買汽油，案件列作壞車，沒有可疑。