天災加上人為炒作，令糧食價格飆升，帶動通脹，但唔少人嘅人工就唔係好跟得上。同做生意一樣，成本上漲，唔想執笠，惟有開源節流。開源就係除咗做好自己份工，力保唔好俾人炒之外，再去學投資，為自己「開拓」多啲經常性收入。
另一方面節流都好重要，有朋友forward咗兩條link畀敏妮，分別係內地家庭同香港家庭嘅慳家提議。有啲提議睇落誇張得嚟幾好笑，好似嚟自內地慳家同胞話，日日冲凉太浪費亦太唔環保，建議一個星期先冲一次。呢個建議真係誇咗小小，反而香港朋友嘅意見比較可取，就係響應政府呼籲，選擇花灑浴，而且將冲凉時間盡量縮短。

消費睇理財王　銀紙好使啲

不過，內地慳家同胞都有啲幾好嘅提議，好似女士們鍾意食零食，從今戒咗佢，既慳番買零食嘅錢，又可以減肥兼美容（零食通常都係多油多鹽兼熱氣），仲有食煙當然要戒啦，為健康為慳錢，唔使多講。至於香港慳家朋友就提供咗一個慳電貼士，呢位朋友提到一款太陽能燈，用LED燈泡，白天放喺窗邊吸收太陽能，夜晚可以用6粒鐘，朋友話喺淘寶網就搵到。敏妮亦有上網search過，呢啲太陽能LED燈，原本設計喺戶外花園用，但盞燈有底座，吸收太陽能後可放回座中使用，室內亦可以用。
其實慳錢有好多種方法，只要從小事上注意。好似《港股王》新加入咗理財王，入面嘅信用卡優惠搜尋器，無論嗰日諗住去邊區消費，都可以先上去search吓邊張信用卡有最多優惠。消費前同投資前一樣，做吓功課，自然可以令荷包腫脹啲，銀紙好使啲。

溫敏妮
http://wanmanli.com/blogs/