法國型男騎師巴度重臨香港，騎咗四期仲未贏馬，上期成績叫做好少少，但都只得兩席季軍，今晚（15日）谷戰隻「大英雄」上季喺佢胯下贏馬，好多人都mark實，奈何隻馬剛周二（14日）宣佈退出，當事人都話無奈。

巴度上季客串時，帶埋任職演員嘅女友Eva一齊嚟香港，Eva仲同荷里活影星安祖蓮娜祖莉有幾分相似，而根據模特兒公司網站介紹，Eva三圍分別係33、25、35。

巴度話22歲嘅Eva今年歐洲、美國兩邊走，接咗唔少廣告同MTV，演藝事業開始起飛。不過，Eva知道巴度再次嚟香港客串，索性暫時唔接job，全程陪男友打氣，夠晒sweet。

巴度話上季客串，Eva因為工作關係並無全程留港，兩人分隔兩地嗰陣，雙方都好掛住對方，所以今次Eva決定留港直至明年2月，即係巴度客串期結束為止，雙方可以日見夜見。

巴度話Eva好鍾意香港，而且香港嘅冬天唔會落雪，點都冇歐洲咁凍，既然有女友全力支持，呢位型男梗係要爭氣，快啲贏馬。

今期巴度有第八場二班1650米嘅「小米周」，此駒上場同程唔再跟前或放頭，而係留到最後，直路追勢極佳，只係輸俾「慣勝共贏」一個頭位得亞軍，狀態明顯復蘇，改變跑法更令人眼前一亮。

今次升上二班，羅理雅做唔到磅而改配巴度，「小米周」英文名叫Lucky Girl，如果真係贏到，Eva名副其實係巴度嘅lucky girl。