由徐小明發起，名為「再見亞視，合照回憶」的懷緬亞視行動——約定昔日及現任亞視員工，今早清晨七點於亞視門口一齊影大合照，緬懷喺亞視嘅昔日情。

大俠霍元甲叫到，自是一呼百應，今日一大早有約五十名亞視員工齊集，就連前任執董葉家寶亦有出席。葉家寶之前幾乎日日要出來代表潛水股東解畫講下點解遲遲唔出糧，依家就輪到亞視公關——即亞視暖男黃守東上陣，相信黃守東此刻感受，葉家寶一定深深明白。

講番轉頭，噚晚徐小明近十一時吹雞之後未幾，亞視股東代表何子慧就透過微信，向打算返亞視影大合照嘅人話到明：「謝絕一切紀念活動」。

亞視拒絕被悼念。