當年今日
關於我們

【垃圾裙不是低谷】姚子裕順境自製壓力患抑鬱 諗定喪禮係時裝騷

蘋果日報 2020/03/26 06:00

胡杏兒茍芸慧婚紗設計師姚子裕

「其實由以前到而家,香港時裝設計師新聞價值唔係好大。」出自從事華麗時裝工業的80後本地婚紗時裝設計師姚子裕(Kev)在香港十多年工作的感受,不過去年12月因一條「垃圾裙」設計風波成名,事緣苟芸慧在婚禮穿了姚子裕贊助的「美女與野獸」主題的晚裝裙,但事後傳出苟芸慧向媒體表示「晚裝是自己設計的」,還私下向人抱怨他的設計是垃圾。之後姚子裕在自己的社交平台沒有指名道姓「放負」,捍衛自己設計而成為新聞主角。
外界可能對姚子裕的名字可能有點陌生,其實他在業界十多年有一定的名聲,有不少明星藝人捧場客,他在英國Buckinghamshire College Group讀時裝,曾經是歌手Cyndi Lauper造型師的學生,也是香港十大時裝設計師,是大台不少花旦視后裙的設計師,曾與胡杏兒合作搞婚紗店,《Britain's got Talent》(全英一叮)評判Amanda Holden及英國歌姬Jessie J也穿過他的設計,他的CV絕對不「垃圾」。
Kev的時裝故事簡單來說,就是少年年代愛畫美少女戰士,在一屋女人的四姊妹家庭玩公仔煮飯仔遊戲而愛上整公仔衫,因父親是公務員獲保送仔女去英國升學,更瞞住父母去讀時裝,他表示:「我同爸爸講去讀設計,爸爸係比較傳統嘅男士,80後(一代)嘅父母都係期望仔女教書、(做)律師,我個妹就係教書,衣食無憂工作,不過設計師工作同衣食無憂就唔係好掛鈎。」
畢業後返到香港,Kev未有即去做時裝設計,在利豐做產品設計兩年,走去參加了一個時裝真人騷的比賽,第一圈就被淘汰,評判給他的評語是「做得唔夠好」,就點起他一團火,拎雙糧積蓄開始了自己的設計師生涯,去火炭工廈成立工作室,買架衣車一條友做時裝:「攞副身家去賭,嗰時犯法瞓工廈,床都冇瞓梳化,車完拎去銅鑼灣度交衫,經歷兩年時間,戶口試過得兩、三千蚊,以前唔識驚月月清,今日收完呢套萬二蚊婚紗,可以用一萬蚊去買料,2,000蚊去食杯麵,嗰時無話要儲錢買樓,父母都擔心,仔女最不務正業係我。」
膽粗粗創業了3、4年就遇到新機遇,他上商台少爺占的電台節目,趁機在大氣電波搵投資者,就搵到一個在內地有婚紗工場的投資者,他自言:「嗰時好開心,23、24歲可以去巡廠,有一大班人幫你車衫,佢哋車得唔好可以ban佢,嗰時爽到,冇諗過賺咩錢,嗰時逼咗個投資者幫我喺香港開一個fashion show, dress過好多星,就打去叫佢哋嚟睇我嘅騷。」合作了一段日子就遇到了拆夥,更要將買樓的首期去開舖及打官司,當時令他有當頭棒喝的感覺,他說:「可能揀錯咗,原來呢個世界唔係你想像中咁易,一直以嚟靠好多運氣加少少talent運作你自己人生,揹咗好多人情,意識到唔堅持落去唔係輸自己,係連累到人哋,呢班人同你通宵做到4、5點,第二朝沖過涼返嚟係好難得,佢哋話『寧欺白鬚公,莫欺少年窮』,叻過姚子裕嘅,招牌撻落嚟『砸』死十個,有呢個緣份識到幫你嘅人就係感恩。」
守得住夢想令Kev在事業上再遇到高山,情緒卻走向低谷,說的是在2015年與胡杏兒合作開婚紗店,發展順利進軍大陸市場,於2018年中去上海開舖時開始情緒受困擾,他說:「一直畀好大壓力自己,諗有一日有人唔需要你嘅設計,一大壓力就肥,有一啲時間有depression,嚴重失眠,有好多執着,要去做一啲催眠療程,估唔到自己去到一個情緒崩潰狀態,最負面有諗過衝出馬路。經濟係OK,但係好多屋企人嘅責任冇負到,身邊嘅人不斷為你付出,又唔到去下一層,我會諗呢個moment衝出去,我嘅喪禮會唔會一個fashion show?」講到與杏兒的合作三年,之後對方突然宣佈退股,他表示:「同杏兒合作時,佢好全情投入瞓身,投入到佢老公都投訴,好畀心機。 香港人一聽到拆夥,就會諗嚟諗去,其實無乜嘢,好簡單,要去湊仔,尤其女士家庭最重要,所以賣返啲股份,開心繼續返去照顧佢嘅家庭,成件事係OK嘅。」
提到他令媒體留下印象的事,不得不提去年的「垃圾裙」風波,他再看此事已少了當日的怒火:「在於一個設計偏執,想保衛自己美學,講完嘅嘢,亦都無諗過發生咁大件事。」是否因為「垃圾裙」一詞刺中神經?Kev表示:「任何人都係,好似一個歌手,有人同你講唱緊垃圾歌會開心?有人煮嘢,人哋話呢碟嘢係垃圾會開心咩?可能係overreact,又係一場課,要學識收下掣。經一事長一智,嗰刻嘅決定都係當時某一刻嘅你自己,就算話好後悔都做唔到啲乜。」問到會否怕了與藝人合作,他說:「藝人都係人,都係一個客人,從來唔好標籤係藝人,雖然佢哋publicity好大,着起我嘅設計會好有影響,我本住着得靚佢係我首要任務。」Kev表示亦歡迎與苟芸慧再合作,他表示:「做人十分我識三分畀自己,可能呢樣係外國係構成唔到障礙,但係喺華人社會有唔同,我格言係一路撞板一路學,最緊要撞我唔死。如果藝人再搵我,我係welcome再合作,件事之後無再溝通,我都係發吓牢騷。」
-----------------------------
第三屆最港電影大獎
按此立即投票
-----------------------------
【武漢肺炎】專頁
全民自救 抗疫資訊盡在《蘋果》
empty
(攝影、攝錄:沈健程、林賓尼)
empty
姚子裕在工作上已有新計劃,不過詳情要稍後公佈
empty
他自言在時裝路途上,碰上了不少機遇
empty
對於早前垃圾裙的風波,他自言上了一課
empty
姚子裕在過去的疫情試過零收入,他表示趁時間可以休息沉澱。
empty
姚子裕從小喜歡畫美少女戰士公仔,建立了對女性曲線線條的觸覺
empty
有指苟芸慧不滿姚子裕設計的「美女」裙,在背後指設計是垃圾,引來姚子裕在fb不開名炮轟(資料圖片)
empty
苟芸慧 穿上的「美女裙」出自他手筆,他在社交平台分享他的創作草圖(IG截圖)
empty
Kev曾為Janice Man的婚禮設計中式裙褂
empty
於2015年曾與胡杏兒合作過開婚紗店,三年後結束(資料圖片)
empty
胡杏兒與合作開婚紗店,胡說八道的好姊妹來撐場(資料圖片)
empty
Janice Man的中式裙褂也是姚子裕度身設計(IG圖片)
empty
2012年的姚子裕與黃馨合作,20多歲的他樣子青澀(IG圖片)
empty
姚子裕有不少星級客人,如張敬軒搵過他設計演唱會歌衫(IG圖片)
empty
姚子裙多年內搞過不少時裝騷,在香港時裝界有一定知名度(受訪者提供圖片)
empty
岑麗香的婚紗也是他設計(IG圖片)
empty
英國歌姬Jessie J亦曾穿過姚子裕的設計(受訪者提供圖片)
empty
《全英一叮》的評判Amanda Holden(左)也穿過他的設計(受訪者提供圖片)