韓國女團AOA成員草娥自3月之後就冇現身組合活動，加上成員珉娥及酉奈曾喺Instagram留下意味深長嘅留言，當時已有唔少粉絲擔心係草娥退團先兆，雖然AOA所屬嘅FNC事務所曾表示草娥只係放緊假，不過今晚草娥就於Instagram留言宣佈退團。

草娥於Ig表示：「唔少人留意我突然中斷活動一事，我深表感謝同抱歉，雖然依家講有啲遲，但我必須告訴大家我不得不選擇休息嘅原因，以及深思熟慮之後做出嘅決定。」

草娥坦言雖然佢於隊內係大姐姐，但因為從小就出道活動，有好多時候都好想喊，於不斷鞭策自己向前嘅過程中發現自己漸漸患上疾病。為咗治療失眠及抑鬱症，佢曾選擇食藥，所以兩年前開始漸漸減少行程，但疾病嘅根源並唔係嚟自於疲勞，所以佢最終決定中斷所有活動。草娥表示佢雖然曾努力嘗試回歸，但個人嘅休息反而會遭到非議，亦為成員帶來更大嘅傷害，因此跟事務所協商後，佢最終決定由今日起退出AOA，之後亦會繼續為成員加油。

不過FNC就否認草娥已經退出，表示仲跟對方討論中。