前排俾雜誌影到拖住妙齡女子但堅決否認搞婚外情嘅城市大學副校長唐叔賢（外號城大謝賢），呢排見到傳媒好似見鬼咁避，噚日終於避無可避要出席城大搞嘅學生頒獎禮。城大公關處護主心切，竟恐嚇所有記者：唔可以發問、追問、出聲，總之副校長就只有一句話講，講完就走，揚言如果記者們出聲嘅話，以後同城大就冇交易！言詞之激，實屬罕見。
結果唐叔賢金口嗰句係：事件已經交咗律師處理，又話事實勝於雄辯，自己同太太已經結婚26年，感情好好，雖然太太定居美國，但聖誕節期間佢有返美國同太太過節。
至於被雜誌話佢同妙齡女郎一齊同居，城大四哥話當時佢同緊個女、岳父一齊住；又話雜誌憑想像，講完就隨即搵公關趕走記者啦。四哥既然話事實勝於雄辯，唔知係咪即係提醒大家睇吓雜誌啲相，就會知道真相？