何傲芝、莊思華、湛琪清等噚晚跟關之琳等城中名媛淑女出席「愛彼女皇盃」假啟德遊輪碼頭舉行慶祝派對。蔡加讚都有出現，不過低胸現身嘅湛琪清到場後，原來仍未知呢位表姐夫冇等佢，經已先行離開。

何傲芝透露爸爸破產官司仍有變數，希望快啲解決，全家會全力支持佢。咁係咪要搵多啲工作？何傲芝就話:「唔關爹哋呢件事，都想多啲客戶搵我做司儀。舊年司儀工作係少啲，今年就唔錯，暫時都排到十月。」

平日都會下注買馬嘅湛琪清，自爆原來平時都愛賭錢，喺美國讀書時經已跟朋友去賭場玩樂，不過佢指自己只係小賭怡情：「去到賭場我樣樣都會玩，不過我冇乜賭運，好多人話冇乜賭運，喺感情方面先會好運。」至於最多一次輸幾多錢，湛琪清就笑笑口話唔講，免得嚇親大家。暫時有不少追求者，問到若果男友賭得好大會否接受？佢就話:「好玩玩少少可以，賭得太大就唔好。」