史篤城（圖）唔係曼聯，唔會怕俾人笑踢擦鞋仔波，今晚英足盃作客到低一級嘅英冠仔布力般，啱晒「高波篤」嘅胃口；少讓平/半，無謂拖泥帶水，直取有2.22倍嘅客W。
英超豪門曼聯，俾韋斯咸大Sam哥嘲笑做「長傳聯」；戰術大師雲高爾要面子，之前記招化身圖表派，高調反擊。其實，最緊要成績，針對唔同對手及臨場變化，用唔同部署，有乜問題？雲帥都係學吓車仔摩佬，少說話專心教波好過。紅魔後晚先至作客到近排好弗嘅英甲前列普雷斯頓，呢支億萬魔軍，今季已試過作客慘負英甲「MK仔」同0:0和英乙劍橋聯；好佬怕爛佬，呢注普軍冷[+1]，值博。
史篤城由曉士領軍已一季半，曾經刻意踢過細膩波，不過隊中始終高佬特多，踢高Q大腳，吊波入對手禁區博亂，搵到食。「高波篤」啱啱周中聯賽表現先盛後衰，主場大敗畀恨贏恨到發燒嘅曼城，表現唔算差；今晚作客到對手實力低一大截嘅布力般，呢排冇咗養傷嘅矮腳虎保贊，必定攻得更直接。唔愁降班嘅史軍，近兩季喺本土盃賽鬥低組別隊，錄得六勝一和未輸過，恰到「細路」喎。

布力般，上一圈多得對手一開波已有中堅基爾巴特利領紅，最後以3:1淘汰英超史雲斯。今屆足總盃冠軍獎金只有一百八十萬鎊，就算加埋電視直播費，對負債數千萬鎊嘅布軍杯水車薪；佢哋喺英冠暫時排第九，博升番英超發大財未絕望，今晚又會先收起入球命脈基斯泰迪及佐敦洛迪斯等主力，應付下周中聯賽快車作客卡城。踢法上，史篤城比史雲斯硬朗好多，以往喺英超對賽常輸嘅布軍呢關難過。
可能踏入二月中，英超隊要兼顧歐洲賽，比賽轉密，唔多想喺足總盃同對手糾纏；查近三季第五圈比賽，合共只有四場和波須重賽再戰，史軍少讓可直取客W。另外再博今晚頭場西布朗掃走大戰連場後、傷兵更多嘅韋斯咸；至於波膽博同日尾場，水晶宮由領隊柏度主理後士氣正濃，火力值中游實力，兼有窄場之利，唔會怕鋒銳嘅利記進襲，入球騷走唔甩。
波神
神級攻略 智破足彩