黃埔是香港其中一個大型中產屋苑，也是和理非社區，過去半年多次發生抗爭事件，在警方催淚彈放題下，居民落手落腳抵抗，在黃埔出生成長的90後阿C亦是黃埔老街坊，經常在毫無裝備下自發落街組隊巡邏，守護家園，他批評警方無理向街坊及民居施放催淚彈，「完全漠視對市民影響。」在紅磡做地區服務的街坊葉健榮坦言，反送中運動以來，見證紅磡及黃埔由「閂埋門各不相識」，到自發晚上在社區巡視，將「家」的觀念由斗室擴展至社區。

記者 金敏琍 攝影 麥超億

本港過去半年以來成為催淚之城，18區處處開花，在抗爭者背後，每區都總有手無寸鐵街坊齊心守護家園，若說黃大仙街坊是「地上最強」，那同樣是「黃」字輩的黃埔街坊，就是「最霸氣和理非」，8月中街坊不滿屋苑保安未阻警察闖入屋苑範圍，連續指罵保安8小時一役，成為了連登一時佳話。

九十後阿C居於黃埔花園，至今20多年，過去半年，這位後生仔重新認識這個成長的地方，「呢廿幾年大家係各家自掃門前雪，閂埋門先係一家人......但呢幾個月，可能係一啲你唔識，就算係一啲年紀大，唔支持呢場運動，但佢都會幫手去善後，或者去幫你睇吓邊度安全。」

阿C政治取態與父母不同，平日都會以一身街坊裝到樓下守護社區，「如果問點解，因為呢個就係我哋屋企，我哋生活喺呢個社區，你(警察)無緣無故入嚟所謂執法，理據何在呢？你需要拘捕嘅人係邊個？有無搜查令，如果無，點解你可以肆意進入私家地方？」

雖然得不到父母支持，但一眾街坊表現卻令他暖在心頭，「一有咩事，所有和理非都會走落嚟支援，如有街坊俾人拉咗，好多人就咁踢拖就落街問有無被拉嗰個人相？有無被捕人士個名？我哋有咩幫到手？呢種守望相助係我呢廿幾年來從來未見過嘅嘢。」

自出世便在黃埔居住的葉健榮稱，黃埔的抗爭重災區是德民街及紅磡道的十字路口，防暴警員經常在該處全副武裝佈防，並與街坊對峙，「我最深刻係10月頭有一次，基本上有啲人阻路，警察已來處理，淨低只係街坊，佢竟然舉旗，嗌咪非法集結，跟住舉橙旗跟住舉黑旗，2秒之後佢開第一發催淚彈同第一發布袋彈。」

催淚彈及布袋彈，甚至越發升級的警暴，並沒有嚇怕街坊，作為黃埔人，葉健榮非常自豪，他憶述其中一次抗爭事件，「都接近200人㗎啲街坊，有老有幼，我見到最老有60、70歲都有，10幾歲好似小學生咁都有......現場街坊真係乜嘢都無......始終催淚彈都係刺激嘢，清洗完啲街坊又再出過嚟，指控啲警察，點解呢度又無示威者，得返啲街坊喺度，都要動用你哋啲武力去對付啲街坊呢？」

除此之外，一班街坊更每晚落街巡邏，男女老幼，自發守護家園，「有段時期啲防暴都好準時嚟，我哋都會早少少去行吓，睇吓有咩異樣，叫啲街坊留意吓........唔止我，真係唔止我，我行嗰時都見到好多人，亦都係有老有幼，大家都係好有一個目標團結，做邊一樣嘢，去守護返個社區。」

-----------------------------
【匿名港警爆大鑊】
韓國KBS時事節目《時事直擊：香港 被自殺》
一按即睇
-----------------------------
【撐學生】
召集有心人 撐學生全年睇《蘋果》
立即按此
-----------------------------
你敢爆，我敢獎！ 立即WhatsApp《蘋果》24小時爆相爆片熱線 或致電：63836568