英國傳媒報道，上季英超冠軍曼城已準備好1億鎊（約10億港元）嘅報價，收購熱刺前鋒哈利卡尼。現年27歲嘅卡尼之前向外界放風，話想今夏離開熱刺，曼城、曼聯同車路士等豪門隨即有意爭奪，ESPN指曼城已準備好測試熱刺主席利維留住卡尼嘅決心，提出包括現金加球員交換嘅方案。不過，ESPN引述消息人士話，利維認為卡尼身價值至少1.5億鎊，加上佢仲有3年高達20萬鎊周薪嘅合約喺身，故此曼城一億鎊嘅報價滿足唔到利維，據報利維決心要卡尼留多一季。