「我無論被封殺，因這件事沒工作，我都ok；但我不ok的是，為何我要繼續做下去。我常問自己，為何我們一直堅持？是為了甚麼？想做甚麼？」六四三十周年，香港電影金像獎最佳電影《十年》(2016)、第36屆香港電影金像獎最佳導演《樹大招風》(2017)的歐文傑，與我們合作拍攝了《六四被忘錄》，裏面王宗堯有這樣的對白，也是今日許多香港人，以及歐文傑，開拍前的心聲。

「你說六四跟我們無關，我都好誠實地，曾覺得六四好像真跟我們沒甚麼關係。三十年了， 我們平反了甚麼？又平反來何用呢？片段裏有好些街訪，覺得那是『鄰國的事』；覺得『咁耐嘅嘢記嚟做乜，放眼將來啦』；覺得『香港人都唔信香港人喇，我點知你哋講嘅係真』，加上傘運之後前景似乎越來越暗，大家都心灰意冷。」但透過拍攝短片，歐文傑與團隊，重新訪問多年仍堅守堅持悼念六四的人，他重新找到答案。這故事令他有個想法：「當王宗堯退出劇場，一個人唔去集會，然後旁邊的人不去， 那燭光就消失了。當好多人都去集會時，這個象徵，可以畀更多人知道，其實你不孤單，甚至你可能對抗的極權。」

哪來的白色恐怖

老實講，白色恐怖一直存在，歐文傑說：「首先我覺得我有免於恐懼的自由的，我就唔會驚，咁煮到埋來咪算囉，但我阻止不了身邊的人唔驚。」今日搞《六四被忘錄》，老婆問：「係咪真係要搞呀？」發行的朋友說：「喂乜咁勇呀？」這些他都非常理解。甚至今次除了他會出監製名銜外，所有導演及工作人員都唔想出名銜。製作時年輕導演已常收到來自大陸的不明無聲電話，響完又響，有一定壓力：「真係同套戲做的一樣，好似六四紀念館都成日有人來搞事，仲有我哋訪問過嘅藝術家，門前被燒衣紙一樣。」但想深一層，僅此而已。搞事的其實都不是甚麼特別人物：「我理解他們的恐懼，加上近這一兩年的香港，整個政治氣氛的改變，變得個個自我審查，白色風暴好嚴重，只係係咪咁樣，我哋就放棄了。」

「驚唔驚影響接Job？」經歷了《十年》、《樹大招風》，歐文傑慣咗被問「小心啲呀」；試過接一份「冇乜特別的工作」，被問可否不出Credit，對方話「你知你幾敏感㗎啦。」轉頭他推掉工作：「現在係我封殺你，唔係你封殺我。做乜啫？而家你覺得我本身唔使放銜頭的，但你咁多嘢驚。有人話恥與《蘋果日報》為伍，何不反過來，係我恥與佢哋為伍呢？」他跟老婆討論過這個問題，老婆仍是唔想知、唔想理：「你若要一隻豬成為一個人，係咪都好荒謬？佢本質係咁，佢可能點講都唔會理解，我理解他們的想法。所以我戲裏，不是想游說一班豬，反而要鼓舞一班本身想做人、心灰意冷的人，重新聚在一起。」

記者：陳慧敏
攝影：蕭志南
編輯：鄒仲安

-----------------------------
放眼世界 ● 籽想旅行
一Click睇盡旅遊資訊！

---------------------------
【六四30】守住歷史 拒絕遺忘
https://hk.adai.ly/zdzKtt2RiW
---------------------------
追蹤真相 守護公義
按此免費訂閱支持蘋果 無阻盡覽
https://hk.adai.ly/PMtkKQIUBV