如果你相信每個人背後都有一個故事，那麼這個故事，大抵就是一個先苦後甜的故事，儘管那一點甜還是帶甘。49歲的黃逎元，是商場清潔工，即是那些戴着口罩、手套，在疫情下定時抹lift掣和大門手把、清洗商場廁所，確保洗手液足夠的打工族。那些年因失業財困，原本在福利機構做地區外展工作的元哥，經朋友介紹在商場試做散工入行，貪即日出糧可解燃眉之急。「最記得有次我媽嚟探我，隔住個玻璃，個心係戚戚然，未過到自己嗰關……」疫潮衝擊各行各業，基層清潔工作在巨浪下反成了避風港，作為過來人，元哥謂最大的難關是要肯去面對：「垃圾唔會無端端消失，廁所有人用過，唔會無端端乾淨番，呢啲工作始終要有人去做。」無分彼此，站在前線守護香港，是他也是你和我。

記者 呂麗嬋

疫情持續，香港出現企業倒閉及裁員潮，多個民間團體的調查均發現，農曆新年後基層市民失業人數大增4倍；社聯上月就疫情下就業情況進行調查，亦發現近90%受訪者因失業、工作縮減等導致收入大減，另亦有65%人在疫情期間壓力增加，出現易怒和失眠等症狀。對此，元哥感受甚深：「我身邊有好多朋友都好耐冇開工，如果我唔係做呢行，咁嘅時勢可能都變咗失業大軍。」全民抗疫，市民對清潔消毒要求特別高，戴口罩、勤洗手，只是病毒無眼，商場人來人往，內設的私家診所以至公廁亦屬播毒高危地帶，不擔心嗎？

「擔心一定有，有啲人都係廁所度染到，馬桶沖水又可能會引起霧化現象，病毒會隨處飄，或者飄好遠或者留喺個表面好耐，我哋嘅工作，正係點樣將呢啲細菌病毒去清潔消毒，每一日都係做緊咁嘅嘢，擔心係會有擔心，惟有做好啲防護措施，始終我哋呢一part如果做得唔好，其他使用者嘅擔心係會更加大。」受訪當天，元哥早上7時開工，到真正能坐下面談，天近黑齊，每天工作近10小時，既辛苦又厭惡，但元哥謂仍很感恩。「今次疫情，對各行各業嘅影響好大，好多休業14日，但清潔係無得停，第二朝人哋要用，清潔咗先可以放心用，人手需求喺呢段時間反而更大。」

原本做福利機構地區外展工作，5年前入行，元哥直言中年轉業尤其轉做清潔工，更需好好調整心態。「最初係經朋友介紹，試吓做散工，嗰時因為經濟出現好大困難，散工可以即日出糧，所以就入咗行，後來做落先再轉職做長工。」與太太離婚、育有一個患有長期病患的女兒，元哥說最困境時打兩份散工，每天朝7晚11。「因為工時太多，所以搬到附近嘅套房住，慳番交通時間。」這樣的非人生活，他說堅持了足足兩年。只是元哥不諱言，辛苦兼工時長尚可咬緊牙關捱過，最難過的反而是自己的心理關口。

「最記得有次清潔緊玻璃幕牆，我媽嚟探我，隔住個玻璃，個心係戚戚然，未過到自己嗰關……講真我幾難想像如果我洗緊廁所，撞見啲親人佢哋仲叫我：『阿元你洗屎坑呀』究竟會係點，好在so far我未試過，之前會好驚有依一日，而家當然比較過得到自己……」作為過來人，元哥有甚麼忠告給那些為生活而需要轉行的人呢？「都係嗰句，能屈能伸，最大嘅難關就係你要自己肯面對，唔好覺得呢份工好似好唔好喎，要接觸嗰啲好多污糟邋遢嘢，事實上垃圾係唔會無端端消失咗，廁所有人使用過，唔會自己無端端乾淨番，始終要有人去負責呢啲工作，呢啲係不可或缺嘅崗位。」走過最艱難的時間，生活總算安定下來，找到相愛的人，彼此扶持，也重新有力參與工會工作，在另一範疇為清潔工友爭取應有權益。

「政府推出抗疫基金，聲稱會為清潔工發放特別津貼，但每幢大廈名額只有6個，亦未涵蓋商場，最重要係清潔工要透過管理公司去申請，好多工友根本唔知有咁嘅福利，亦都唔知點樣申請。」他說：「點解同一個住宅大廈，有啲人有但有啲人無，政府話想我哋提高士氣，但結果可能係掉番轉，削弱咗個士氣都唔定。」作為基金下「被遺忘了的一員」，元哥促請當局放寬津貼名額及範圍。「我哋唔係醫護，唔會話係爭分奪秒去救人，只係做好自己嗰份工，但做清潔呢行，接觸到病毒嘅機會始終係會比其他行業高，希望政府都可以尊重我哋嘅行業，公平處理。」元哥說。

-----------------------------
【武漢肺炎】專頁
全民自救 抗疫資訊盡在《蘋果》
-----------------------------
無懼警暴 學懂自救
《抗暴之戰●法例須知》讀果 上架
-----------------------------
App內1-Click訂閱《蘋果動新聞》
按此了解更多