范太噚日去到大角嘴融樂會同一班少數族裔青年真情對話，唔少人趁機會同范太盡訴心中情，大談喺香港讀書、工作有幾咁難。融樂會總幹事王惠芬突然有感而發，話好少政治人物、領袖願意落區同少數族裔見面，感激范太抽時間出席，佢仲即場踢爆，原來今年5月已經主動邀請梁振英同佢哋溝通，不過被CY一口拒絕，到第二次當面見到CY，再請佢都係唔肯，令人好失望。
多謝融樂會，令香港人睇清楚CY嘅真面目。王惠芬又話，唐英年未辭職嘅時候，已經唔關心少數族裔，希望佢家辭職後，可以放下身段，落區同少數族裔青年接觸，聽吓佢哋嘅訴求。睇怕唐唐都應該要盡快修補一下，佢同弱勢社群之間嘅情感上的缺失。