【新增動新聞】
港協暨奧委會收到逾50宗空手道運動員投訴香港空手道總會（空總）選拔不公，雖然經調查後認同投訴屬實，但暫緩取消會員資格的處分，只要求空總一個月內提交改善措施。投訴人之一、世界排名第7的頂尖空手道運動員鄭子文不滿港協的決定，「奧委會佢哋嘅決定，好似放生咗總會、畀機會總會，但調返轉，有無人畀機會我哋運動員呢？」

今早出席電台節目時表示，多次向空總要求查看選拔賽果，但空總聲稱要「保護運動員私隱」，拒絕公佈選拔分數，「大家成績都出咗嚟，有高低之分，點解唔可以攞嚟做參考呢？但佢哋就好反對我，話：『無論你出面打成點唔關事』。」

鄭子文指，過去兩年是自己的事業高峰期，參與其他排名賽事表現良好，世界排名維持在前10名，但因在空總選拔賽落選而未能參與國際錦標賽，「心情好低落」。他解釋，若能在錦標賽中獲得獎牌，對自己的世界排名會有很大裨益，「我哋去到世界頭十嘅運動員，真係好講呢啲分數」。他指空手道比賽規則列明教練不能在比賽中為自己的學生評審，但曾有教練在空總的比賽中為自己的學生評分，即使有家長投訴，空總都拒絕跟進。

曾獲香港公開賽冠軍、目前全球排名14的周曦活指，原本憑其公開賽成績符合在體院接受訓練，但空總指她的成績未夠將她「踢走」，「總教練喺會議上好支持我、畀我繼續練習，但總會個邊嘅職員就唔係好支持總教練嘅意見，今個月訓練完咗，下個月就無得練」。

鄭子文又質疑香港精英運動員培訓方式古怪，最近更撤銷空手道運動員「潛質隊」，令尚未做出成績、但有潛質的運動員無法繼續接受體院訓練，「潛質隊呢啲位置唔係要用好多資源，佢哋只係要有權利、有個機會接受訓練」。