蕭正楠同黃翠如拍拖4年，其間屢傳婚訊，喺今年4月仲有傳佢哋去出走秘密註冊，不過事後佢哋話：「結婚嘅傳聞已經回應得太多了，不再回應喇！多謝關心！」(新聞連結： https://bit.ly/2w8mqG6 )

唔知係咪因為翠如日前去咗《美女廚房》做嘉賓，雖然佢多次俾男友批評廚藝，點知嗰日佢炮製嘅魚粥，竟然令大家跌晒眼鏡——個個都話正，蕭正楠都讚好，搞到翠如感動到當場落淚，令大家都嚇咗一跳。之後同場嘅林盛斌、張振朗、吳卓羲同黃宗澤起哄，叫蕭正楠拎婚戒向翠如求婚，仲話約定喺紅棉道等！

今日有周刊報道，蕭正楠之所以一直未向翠如求婚，因為自覺得財力唔夠，所以希望努力搵錢，一方面希望送層樓俾翠如揸手，另一方面亦希望買粒大鑽戒同女友求婚。雖然翠如嘅屋企人都曾經催婚，不過翠如都話男友已經有晒計劃，但私下表明希望一年內成事。

報道仲話翠如日前同妹妹去咗康樂園睇樓，不過事後佢接受周刊訪問，只係話陪妹妹，結婚嘅嘢，就要叫大家同番蕭正楠講！

精選娛聞，喺晒《娛果》
http://fb.com/appledailyent