未曾投票，選舉條例經已亂晒龍。個政府一面猛咁播出宣傳聲帶叫人踴躍投票，另一方面就用各種畸形方式壓制選舉氣氛，例如電台要設立「選舉冷靜期」，又要求候選人喺電台拉票只可以叫市民「支持」自己，唔准叫人投自己一票。
乜嘢叫「選舉冷靜期」？各大報刊要唔要積極配合？想選舉冷靜啲，係咪三月份嗰陣就應該謾罵少兩句「漢奸」同「港獨」？候選人出街派單張拉票，電視新聞轉播，播幾耐先至叫熱情，播幾短至叫冷靜？
重有啲電台節目，規定唔准提候選人個名，一提親就要個個都提。例如喺《風波裡的茶杯》，一講到「曾經被辱罵為漢奸嘅李柱銘」，為咗平衡，係咪應該個個候選人個名都加番漢奸兩個字，位位嗌勻，咁先叫做「平衡」？一個選區有幾十個候選人，個個名都叫勻，要佔用幾多分秒大氣電波，係咪提呢個唔嗌嗰個，就變咗偏心？