一連6場「HINSIDEOUT張敬軒演唱會」今晚假紅館開鑼，英皇老闆楊受成率旗下藝人捧場，包括：鍾欣潼（阿嬌）同未婚夫／老公賴弘國、容祖兒和媽咪、溫碧霞，另仲有蔡一傑、鄭欣宜、林欣彤、溫碧霞、JW同富二代男友Tarzan、林欣彤等撐場。

演唱會於8時32分開騷，軒仔戴掃把假髮、着熱褲騷冇毛腿，腳踏高踭鞋，以「降兩度」LOOK驚艷出場，又跳唱英文歌《Crazy in love》，跟着用泰文唱《失戀》，軒仔風騷晒光脫脫冇毛嘅腳，之後唱印度話《Jai ho》，又用韓文唱《No Body》，軒仔晒完四國語言，最後用廣東話表示：「知大家會識唱呢首，大家一齊起身跳！」唱完更舉V扮港女擺甫士。

唱完幾首歌後，軒仔說：「你哋見過天后未呀？唔係銅鑼灣隔籬嗰個。歡迎大家嚟到《降兩度演唱會2018》。」跟住向四面台觀眾鞠躬，因為軒仔着熱褲上陣，為免走光，鞠躬時用手掩pat pat，之後佢再話：「就算張敬軒老闆喺度都講，今晚如果冇我，張敬軒開唔到6場演唱會，楊生、Mani可以考慮下我。」

軒仔用「降兩度」口脗話：「每個演唱會都係令到歌手好難忘，自己第一次紅館演唱會，見到好多陌生男士眼甘甘望住我，搞到我有啲高潮。」全場爆笑，佢重申：「係演唱會高潮囉。」軒仔話自己會喺台上換衫，又大爆自己為咗演唱會做咗人生最重要嘅事：「就係剃腳毛，用咗個幾鐘。」

唱完《我本人》後，軒仔問觀眾：「呢首歌係咪唱得好過原唱者鄧麗欣？哎吔，我搞錯咗，係吳雨霏，舊年我喺網上唱完呢首歌之後，吳雨霏去咗生BB，我覺得我唱乜嘢都係會生嘅人囉。開心時間過得好快，我嘅演唱會已經到尾聲，歡迎大家嚟到紅館睇史上最短演唱會，自己真係好唔捨得個舞台，如果今晚買飛嚟睇我嘅人，睇完呢首歌可以走啦，由黃色大門出去。」

跟住唱《女神》時力撐欣宜：「呢首歌好代表我個人，大家都知原唱係邊個，呢首歌好有意義，網上消息好發達，啲人審美眼光覺得有前有後好勁，我覺得原唱嗰個先係真正女神，佢有前有後有左有右。」此時見到台下欣宜，即大嗌：「你好，多謝前輩嚟捧我場。」