所謂江山代有人材出，今季湧現嘅新馬中，東廐「牛精叻仔」可以話非常突出，喺新馬賽兩度建功，兩次都贏超過三個馬位或以上，之後插班同舊馬較量，一樣冇難度，好快就攻陷三班，擊敗另一匹惡馬年長一歲嘅「太陽驕子」，食菜咁食累積三捷，升至80分二班水平，將會同廐侶「英勇大師」爭奪今季最佳新馬榮銜。
講到「牛精叻仔」咁勁，咁「金獅福將」豈不是更厲害？點解呢？「牛精叻仔」喺新馬賽唯一敗仗，正係輸畀「金獅福將」，後駒㩒住贏「牛精叻仔」，不過一戰即勝後，「金獅福將」就冇再上陣，好似失咗踪咁，究竟佢有乜事呢？原來隻馬嗰場之後傷咗，要做手術鑲螺絲，修補右前腳嘅骨裂，真係諗起都慘情。
霍利時馬房自前世界馬王「爪皇凌雨」後，都冇乜超級馬出現過，真係衷心祝福「金獅福將」，只要佢好得番，肯定係時廐將來爭逐中短途大賽嘅重要籌碼。