話咁快聖誕節，小藍都想買番部手提攝錄機同女友影吓燈飾，潮流興高清，巿面都有唔少全高清攝錄機。噚日同消委會老友傾開，佢話對於高清電視機，大家對全高清（fullHD）嘅定義比較一致，螢幕面板（panel）嘅像素要達到1920x1080，先可以叫全高清；如果電視機可處理同播放畫面像素係1920x1080嘅影像，但螢幕面板實際上嘅像素較低，只可以叫HDReady。
老友話，高清攝錄機就冇統一嘅全高清準則，好似有啲產品內置影像感應器（imagesensor）嘅像素係1920x1080，但實際上攝錄儲存嘅影像，最高像素只係1440x1080。呢種設計嘅攝錄機聲稱自己係全高清，有商榷餘地。