噚日煲呔大日子，照舊由老婆傍住現身，雖然參選宣言有提及兩個仔，不過兩個仔同新抱都好似隱咗形咁，外國政客參選多數全家總動員拉票，煲呔其實有苦衷，若然家爺仔乸出場能令佢民望上升，你估佢會收埋屋企人？
事關多年前佢大仔慶衍仍喺英國讀醫時，煲呔曾鬧出疑用特權，要求醫委會豁免英國醫生考本地執業試風波，自此兩父子甚少一齊公開露面；細仔慶淳則喺美國逍遙，煲呔講過細仔覺得做第一家庭成員壓力大，因此只要一日佢係特首，細仔都冇興趣返香港，老竇好意思叫個仔助選？
煲呔對手梁家傑有三個細路，大女穎翹留學英國，買機票返嚟隨時要計選舉經費，一對孖仔皓宏、皓偉亦唔鍾意拋頭露面，由得老竇單拖上陣撲「飛」。