電影《皇家特工：金圈子》（Kingsman: The Golden Circle）啱啱於韓國首爾舉行記者會，出席一眾巨星主角哥連費夫 (Colin Firth)、泰隆艾格頓 (Taron Egerton)及馬克斯特朗 (Mark Strong)都有出席見記者。

記者會於韓國時間今日11點於CGV Yongsan Cinema Hall舉行。哥連費夫首先感謝記者來臨：「我係首次嚟韓國，之前都係去美國、英國做宣傳，好特別嚟到韓國呢度。」而泰隆就話：「今次係我第二次嚟韓國，好享受，食咗炸雞及飲啤酒「치맥」，相信我，係我食過最好食，我承諾會再返嚟。」另外馬克都話好榮幸嚟到，仲指粉絲嘅歡迎令佢好驚奇。

哥連費夫似老竇

另外哥連費夫同泰隆都有講到今次嘅關係。泰隆：「今次我哋嘅角色關係相反，第一集哥連費夫帶住，今集我幫返佢回復記憶。」哥連費夫仲講笑話自己似對方老竇！「第一集我似佢父親，絕對信任佢，今集同泰隆嘅關係在信任同懷疑之間。」又話自己估唔到會「翻生」回歸電影：「導演第一集整死我，我自己都無預計回歸，但估唔到第一集咁成功，先有機會拍第二集。」最後泰隆仲俾心心手勢記者，非常識做。