新世界集團大公關關則輝喺行內出晒名打得做得，乜嘢都搞得掂，佢老哥今年一月突然遞信唔撈，大家都好想知道邊間公司咁厲害，可以揮底「彤叔」鄭裕彤，成功搶到關則輝過檔。登登登登……答案原來係恒隆地產（101）。
華華聽聞，關則輝下星期二喺新世界lastday，好快就會過恒隆，幫老闆陳啟宗同陳南祿「雙陳」，進一步搞好恒隆嘅企業形象。

公關界大玩音樂椅

查實關則輝過檔恒隆，真係好多巧合嘅結果。事緣太古地產前公關阿頭司徒少貞舊年中病逝，佢個位懸空咗大半年，上個月先由林珩頂上，林珩曾經做過國泰（293）、港龍嘅公關，去太古地產之前就喺恒隆做公關阿頭，於是乎，恒隆咪要周圍請人囉。
最重要嘅係，國泰前行政總裁陳南祿去年中唔搞飛機轉做地產，去咗恒隆做董事總經理。關則輝早於90年代，喺國泰做公關阿頭，當時陳南祿已經係國泰副董事總經理，兩人合作早有默契。據聞，陳南祿知道關則輝遞信，咁啱恒隆又有個位，就向關則輝招手，兩人一拍即合。
不過咁，關則輝喺新世界，並唔係一個普通大公關，彤叔私事都略知一二，可謂大內總管，去到恒隆，又點會做公關阿頭咁簡單，聽講佢嘅新職位都唔少嘢。

李華華
mailto:[email protected]