民主黨年底改選領導層，今日截止報名參選。南區區議員、乳鴿仔區諾軒決定再接再厲，今屆再挑戰劉慧卿主席之位，希望為黨內帶來新氣象。至於被挑機嘅卿姐呢，真係你急我唔急，對主席位似乎志在必得，截至噚日都未報名，可能都係想最後一秒先壓軸登場。有白鴿黨中人話呀，如果卿姐參選，幾乎坐定粒六，難怪卿姐咁老定！
攞咗頭彩噚日率先報名參選主席嘅區諾軒，講明唔係「陪跑」，「我係認真參選，以當選為目標」，勢要同卿姐決一死戰咁款！佢話呢次決戰會主打兩大議題，以「從地區開始贏回香港」為口號，重點係做好明年區議會選舉工作，大嘆泛民選舉工程比建制派落後至少10年，係時候要改善，仲話白鴿黨嘅中國政策政綱不時進退失據，建議喺不涉歧視情況下提出香港本位同港人優先等建議。