方力申(小方)同周永恆(Roy)今日喺太子出席「圖騰跑2014」首屆慈善山野賽，為基督教正生會及基督教正生書院籌款。周永恆表示已自薦參加16公里賽事，佢話：「我近排熱愛跑步，尤其係跑山。」好健康喎？Roy笑住話：「唔夠方力申健康，佢近排爆肌，梗係妒忌，我都爆0架，0依家唔係立志跑16K，係立志爆肌，我想挑佢機。」

講到小方要食白烚雞肉，Roy話：「佢要脫水嘛，我練啲肌肉出嚟先再脫。」咁除唔除衫？Roy笑住話：「練到梗係脫，一下唔覺意有個籌款搵我影相，要我遮住少少，我都夠膽影，只要脫嘅角度，唔係色情我都ok，前排有班運動員影咗輯相都好優美，用另一個角度睇裸體，若然練到好似張家輝，就咩都冇所謂。」

小方亦表示要再開始白烚餐單，係咪女友鄧麗欣嫌棄你冇腹肌？小方話：「本來都冇，我最近睇番我參加奧運條片，發現自己嘅身形都唔及0依家好。」

講到小方早前喺微博呻拍劇辛苦，佢話：「呻過一次啫！」講到佢呻休息唔夠、改通告又唔通知你？小方話：「過咗去就算，做嘢有邊個唔辛苦。」

唔通知你而感到激氣？佢話：「嗰下係，係因為溝通慢咗。」你同阿姐汪明荃合作，冇理由唔夠休息時間﹖小方反問：「何以見得呢﹖」阿姐拍劇要求有8個鐘休息，小方口快快話：「其餘16個鐘咪我嚟頂，我嚟做，講笑啫，阿姐同松哥(劉松仁)係非常好嘅對手，最佩服阿姐係一個好好藝人，聽話又守時。」