你決心爭霸，我護級心切，要變，今個月係最好嘅時機。
曼城又豪擲萬金，一定要砌到兩隊精兵，攻打歐聯同聯賽；挾14年英超入波最多球員威名，韋菲特邦尼值唔值2,800萬鎊？短線計，象國嘅邦尼打完非洲盃到1月尾，同「大佬」耶耶一齊歸隊，屆時曼城夾埋歐聯16強即戰巴塞兩回合，最少仲有18場波；加到10萬鎊周薪嘅邦尼，喺阿古路同祖維迪已傷癒，迪斯高到下個月亦應該出得番之下，仲有幾多場波可以上陣？油王老闆落柯打要買多件玩具，唔怕俾歐洲足協繼續罰錢，只要砌到兩隊精兵畀比歷連尼舞，攞唔到盃炒人有晒理由。巴塞一放美斯到後備席，講到好似世界末日，咁邦尼呢？歸隊日子太短，連藍月亮首回合鬥巴塞嘅後備一席都未必穩有。睇番曼城2月後嘅賽程，國內最難踢只剩番作客利記同曼聯；下半季，曼城再唔使用占士米拿踢箭頭咁騎呢，鋒力料進一步增強，加埋「大隻仔」、踢法全面嘅邦尼，喺國內將會多踢兩至三位前鋒陣式，霸氣球隊增兵，加碼同車仔撼過，做法非常正路；只憂中堅高柏尼今季唞多過踢，法國中堅文加拉去夏3,200萬鎊過到嚟，暫時表現一般，曼城呢隊波嚟緊追入球「大」，更妙。
講番邦尼喺英超嘅母會史雲斯，中游分子又不愁降班，放走佔隊中入球近35%嘅邦尼，1年多投資，回報率超過1倍，無可抗拒，當然亦即係宣佈咗放棄爭前列踢來季歐霸。回顧上季法國中場派牌嘅卡比耶以近2,000萬鎊，從紐卡素返法國投另一油王球隊巴黎聖日耳門；紐卡素由佢離開前達50%聯賽勝率，急跌至最後16場聯賽只勝出其4嘅25%，你話冇咗隊中王牌，對中型班影響有幾大。史雲斯今季夠數，唔會亂花錢，重用已過氣嘅法國中鋒巴菲迪高美斯代邦尼，係下半季嘅正路部署，但呢個月冇埋大腦奇誠庸，唔值再熱捧。