眾港姐前晚到達台灣阿里山,諗住噚日一早拍外景,點知當地由前晚起一直落雨,天氣仲突然轉凉,搞到班港姐要捱冷擔遮拍攝。而黎諾懿就接羅仲謙棒,陪港姐拍攝,佢同1號甄敏婷、2號關曉琳同3號許亦妮(Whitney)最多同場機會。
黎諾懿話對Whitney、5號朱晨麗同13號蔡慧欣印象較深,問黎諾懿係咪因為Whitney被爆不停媾仔所以先咁留意?佢話唔係,仲反問:「係咪真?佢都冇我。我同1、2及3號拍攝時佢哋都好乖,咁辛苦都冇怨言。」問黎諾懿會唔會同Whitney特別多溝通?佢話:「冇,但我都要有男士風度拖吓佢哋。」對於拖手一事,Whitney煞有介事話:「我都係拖女仔多。」擺明怕惹緋聞。但黎諾懿話真係有拖佢手,Whitney即扮失憶:「冇印象,我自己會小心行路。」