鄭秀文（Sammi）噚晚第十一場紅館騷，請來同佢合作過《百分百感覺》及《百分百啱Feel》嘅型男鄭伊健，擔任表演嘉賓，伊健出場時拖住Sammi一邊唱一邊跳舞，Sammi笑說：「靚仔真係唔同啲，你哋呢（指觀眾）滴晒口水。」

伊健表示喺後台睇電視，發現Sammi經常抬頭望，好想知佢到底望乜？Sammi笑説：「其實我有自戀狂，因為要照鏡，呢個係我好大嘅鏡（指大螢幕），我要照下呢個角度靚唔靚，個籮柚咁扭好唔好呢，隻手咁擺又好唔好呢。」

Sammi又自嘲出名係自戀狂，否則不會操到八舊腹肌。Sammi與伊健呢個「雙鄭配」合作拍戲，已經係十多年前嘅事，佢笑問：「我哋上次合作係『百份百感覺』定係『百份百啱Feel』、『百份百感冒』呀？我唔都記得咗個名。」伊健笑言係《百份百啱Feel》。

Sammi慨嘆過咗十幾年，佢一直都想再同伊健合作，最好伊健繼續留長頭髮到腰，佢就剷到skinhead，佢覺得咁樣好特別，片名仲可以叫《百份百夫妻》。

伊健表示以前有很多回憶，係代表咗一個年代，如果再合作又係另一個年代，若有導演找佢哋合作一定OK。台上伊健又展示手錶，原來係Sammi送畀佢做嘉賓嘅禮物，Sammi笑說：「你收得我隻錶，就係我嘅人，所以你留低唱歌，我去換衫。」之後伊健獻唱一曲《發現》。