從事新娘化妝的張小姐大半年前在網上發現一個名為《一刻館》的交友網站，她見網站意識正面，又可於空閒時到其留言板交友及傾談，故登記成為會員。其間曾透過網站結識一些朋友，偶爾亦會在網上閒聊，一直相安無事，直至早前其電話號碼於網上被公開後，噩夢即開始。
日接逾百個電話
「晨早又有，半夜三更又有，總之就係無時無刻，試過一日有成百幾個電話咁多，成個人幾乎崩潰！」張小姐表示，自今年九月二十九日發現有人冒認她，將其個人資料及假照片發放在網站的「住客資料」欄，內容更提及「……如果你哋想約我出街嘅話，打畀我啦……得閒打……937×××××……」此後，她便經常接獲來電，表示想跟她交朋友，來電者更稱是瀏覽過《一刻館》而看到其電話號碼。
張小姐感到不勝其煩，雖然她已強硬地要求來電者不要再來電，惟那些厭煩的電話仍然不分時段不斷響起。「我惟有不斷電郵網主，希望佢可以刪除我個電話號碼，我同幾個朋友一齊寫電郵畀佢，每人至少寫咗六、七個，都冇人回應我哋，真係求助無門！」在無計可施下，他們於網站留言板上勸喻大家不要再致電張小姐，惟仍沒有太大改善。
「加入《一刻館》無非想結識多些朋友，豈料卻換來無止境的滋擾，這並非我所預料。」張小姐由於工作需要，不能將這電話號碼取消，否則客人便聯絡不上她而接不到生意。「雖然十月尾睇番個網已經刪除咗個電話號碼，但公開喺上面成個月，個網主都唔知有冇搞錯，成個月先幫我哋取消，可能有啲人已經抄低咗啦！呢個噩夢真係唔知幾時先完！」