內地汽車業舊年幾好景，車廠、車行都賺到笑，除咗比亞迪（1211）因為銷量下跌，舊年純利大倒退3成，連累好多小股東車毀人亡；但咪以為老總王傳福應該笑唔出，反之，佢竟然連續3年登上最高人工車企老總嘅寶座，成為真正嘅車神！
內地《蓋世車網》話，王總呢3年嘅年薪，分別係336萬人仔（下同）、342.2萬同401.7萬，遠遠拋離其他車企，排喺佢之後第二高人工嘅江鈴汽車，雖然唔知老總陳遠清嘅確實底薪，但江鈴支畀佢嗰份糧，呢3年都只不過係217.6萬、255萬同255萬，而其他車企嘅老總，大概都係每年百幾二百萬左右。