中投運氣有幾好，睇佢入股黑石（Blackstone）、大摩損手之餘，連投資全美最大貨幣市場基金ReservePrimaryFund（RPF），都撞啱美國貨幣市場基金贖回潮，就知佢哋有幾「好運」。不過，噚日中投網站出咗通告，澄清佢哋唔係RPF嘅投資者，而係債主──即係有錢攞番，唔會蝕好多咁話。呢樣嘢喺咁嘅時勢好緊要，俾人誤會就唔好啦，梗要劃清界線。
中投旗下StableInvestmentCorp.（SIC）上個月做咗RPF最大股東，揸住11.1%股權，而RPF係全美最大貨幣市場基金，當時冇人諗到佢會出事，點知遇上雷曼兄弟爆煲，RPF亦受牽連，掀起基金贖回潮，佢哋嘅基金因每股跌穿1美金而被停止贖回，作為大股東嘅中投只能嘆句黑仔。
本來美國財政部講咗，保證上個月19號前，持有基金嘅投資者可以攞番啲錢，不過RPF唔包括在內。咁就弊，有傳媒同中投計數，話佢可能會因為咁蝕541億港銀。

RPF退番首批35%資金

所以中投特別聲明，話佢哋唔係股東，而係債主，堅稱喺RPF宣佈停牌前，中投已經發出贖回指令，所以有權要求退番晒本金同利息；而RPF亦書面通知話會全部退還，近日已開始進行第一批退還資金，佔欠款嘅35%。
中投又話，唔會承擔可能面臨3%本金嘅損失，原因呢？都係嗰句，堅持佢哋係喺停牌前贖回，冇理由要佢哋孭囉。講到尾，都係想話畀大家知：我哋唔係蝕好多咋。
李華華
mailto:[email protected]