訪問前，叫兩師徒鄧漢昇跟呂麗瑤「鬥欄」，結果42歲贏了24歲，在旁的攝影師驚訝說：「佢真係贏到？」有甚麼出奇，阿昇是昔日欄王，他2004年創下的14秒32港績足足保持了10年，瑤瑤近4年在阿昇指導下屢創個人最佳（PB），兩年前曾試過單月內5破PB，最新是今年4月亞錦賽的13秒32，距離塵封25年的港績只差0.18秒，綽號「呂神」的她也說：「破紀錄呢件事，當然越快越好！」

跟阿昇及瑤瑤做訪問，不但絕無冷場，而且笑聲不絕；不要看阿昇樣子文靜，但講起跨欄，無論是他的陳年往事、威水史，還是愛徒呂麗瑤（阿昇是全名稱呼瑤瑤的），可以說不停；24歲的瑤瑤外表cool爆，但說起阿昇（她是這樣稱呼教練的），由他愛遲到兼火爆脾性的陋習，到訓練時一絲不苟，為愛徒鋪路屢創佳績，盡顯90後女孩子調皮活潑的一面。

訪問當天是瑤瑤從早上9時的訓練，大熱天時也無損她做好每一步驟，由徒手熱身，到擺欄練技術，都是自己落手落腳；1小時過後，阿昇仍未現身，瑤瑤苦笑搖頭，小記也知不是第一次，阿昇又遲到了。大情大性的瑤瑤也說：「遲到真係好乞人憎，好多時我哋超早到運動場熱身，熱成一個鐘，之後佢又未到，大家你眼望我眼，試過打電話比佢，佢話『我依家送完老婆，喺大老山，就到』，有時真係好忟，佢又唔講定要我哋練咩，我知佢係想睇住我哋練，以免我哋受傷，但遲到好乞人憎囉！」在旁的阿昇尷尬地笑着，有不開心的，即時講出來，這也許是兩師徒的相處之道，阿昇照單全收，只是身不由己。

現年42歲的阿昇從短跑轉玩跨欄，他說20歲已破了香港男子110米欄紀錄，曾踏上全運及東亞運頒獎台，2004年27歲那年更5破港績，他的14秒32紀錄保持了10年，到2014年才被梅政揚打破；2007年無憾退役，之後到美國深造，09年回港正式成為教練，2011年結婚後育兩女一子，大女6歲、二仔3歲、細女1歲幾，可以想像他可以好忙，阿昇解釋說：「其實我好幸運，我好享受做教練，家人亦好支持我呢份工，我好想每一樣嘢都做好，又想親身去湊細路返學，因為呢啲時間過咗就冇，但每日訓練都練到夜晚8、9點，唔係好多時間陪家人，所以喺許可情況下，做番作為爸爸同老公嘅責任，呂麗瑤講得啱，有啲時間預得好『忟水』。」

身高1米77、比阿昇還要高的瑤瑤，2015年12月開始接受阿昇訓練，撮合兩師徒的是現任田總副主席徐惠芬，阿昇回憶說：「真係阿姐選咗我哋兩個，當時係2015年聖誕節前，阿姐見呂麗瑤兩年來都係自己練，冇教練跟，就約咗我哋二人見面，當時我都唔識佢係邊個（其實瑤瑤當時已拿過亞青銅牌，亦去過2014年仁川亞運會），我最擔心係答應做佢教練後，如果做得唔好，成件事會攬炒。」

以為天生手長腳長、小學已開始玩田徑的瑤瑤是運動場上的勝利組，但事實上有很大出入，她說：「小學真係玩囉，去到中學，因為我唔夠人跑得快，跳又唔夠人跳，跨欄冇人夠膽跨，我咪去跨囉，跨跨吓又覺得OK喎，就繼續呢個項目。」她當時就讀的培正中學，憑她在田徑場上的表現，協助培正由學界D2升上D1。除了成績的鼓勵外，她亦在跨欄找到滿足感：「我鍾意跨欄，佢比到我滿足感，呢種滿足感好易攞，你可以試下跨，其實都好易跨過呢啲欄，每次跨過都有滿足感，呢種感覺令我好開心。」無獨有偶，阿昇也是鍾意跨欄那「滿足感」，身高1米75的他說：「我每次跨完欄都鍾意望返後面，係一件好震撼，好有成功感嘅事。」

記者：徐嘉華
攝影：李家皓

呂麗瑤小檔
年齡：30/11/1994（24歲）
身高：1米77
體重：55公斤
中小學：培正
大學：中文大學（體育運動科學系，預計今年12月畢業）
主項：100米欄
所屬田徑會：屈臣氏田徑會

現任教練：鄧漢昇（2015年12月至今）
成就：
2018「傑運」「最具潛質運動員」
2018香港田總「全年最佳女運動員」
2018雅加達亞運100米跨欄銅牌
2017土庫曼亞室運60米欄金牌

--------------------
7月4日起 《蘋果動新聞》只限升級壹會員閱覽
繼續撐蘋果！
https://hk.adai.ly/e/iIRREmuwDX
--------------------
《體蘋果》陪你睇波講波
https://www.fb.com/appledailysports