近排少有喺香港露面嘅林峯，今日現身《IFPI香港唱片銷量大獎2016》時，連擸三獎，分別有「最暢銷本地現場製作音像出品」、「十大暢銷本地歌手」、「全年最高銷量本地男歌手」。

林峯透露自己嚟緊23號會喺廣州開演唱會，現場所見，林峯瘦咗整整一圈。佢就話：「因為廣州演唱會會預剝衫，所以瘦啲好睇啲，o依家減到140幾磅，其實對上開演唱會，自己都減到139磅，所以都冇話瘦過之前。」

林峯表示自己原定10月同11月，有幾場大陸騷要表演，但因為撞正十九大，大型演唱會攞唔到批文，嚟緊又會接兩部電視劇同電影，所以完成廣州騷後，最快要到出年先可以再開演唱會。

講到要keep住鋼條身型，林峯笑言本身好鍾意食嘢，所以o依家都好似精神分裂咁，不過佢話女友千語BB都贊成佢keep住瘦，事關着衫會好睇啲。而千語BB早排就話自己好少見林峯，對此林峯就話：「咁佢有時都過嚟住嘅，半同居？正常交往，過夜都好正常啫。」講到有冇結婚打算，林峯就話大家各有各忙，所以暫時未諗住。