陳寶珠同梅雪詩（阿嗲）主演二十場嘅《牡丹亭驚夢》，噚晚剛好演出一半，今晚會小休一日，明晚繼續公演，踏入第十場，寶珠姐同阿嗲喺謝幕時特別答謝Fans支持，佢哋同一眾演員大叫「牡丹亭驚夢、經典再相逢、十全十美、再接再勵」。

憶述第一場演出時，寶珠姐坦言心情緊張，之後就越做越入戲，同阿嗲默契亦越來越好，佢笑住問身旁阿嗲話「係咪呀公主，麗娘妻！」阿嗲笑住答「我哋成日對住梗係有默契，我哋又勤力嘛！」休息一日，佢哋異口同聲指要爭取時間休息，寶珠姐話「我要去做facial。」阿嗲就「我要去洗頭同瞓覺。」

頭十場演出，佢哋都係負傷上陣，寶珠姐患重感冒同咳嗽，佢以中西合壁治療法務求早日康復，寶珠姐又爆阿嗲係忍痛演出，阿嗲話：「抵我受傷嘅，我為咗避車，自己撞咗埋的士泵把度，自己唔小心啫！」師傅白雪仙嚟過睇幾場，睇騷時寫低筆記，完騷後再到後台又親自落手示範教路。