ViuTV《Good Night Show全民造星》目前播緊30強嘅淘汰賽，但實際上10強已經誕生，據《蘋果》了解，10強除咗大熱姜濤、楊樂文(Lokman)、龍志權、梁業(肥仔)同陳卓賢(Ian)之外，仲有江熚生(Anson Kong)、應智越(細貓)、邱士縉(Stanley)、李駿杰(Jeremy)、同呂爵安(Edan)，之前被視為入硬10強嘅許靖韻舊愛羅啟聰(狗毛)，竟然出局10強止步。

據《蘋果》收到消息，ViuTV決賽嗰晚決定進行直播，到時可能會搞埋觀眾網上投票，但地點同確實時間等尚在研究中。另外，目前起碼有3間包括唱片公司爭住簽姜濤，而ViuTV有意搞男團，成員當然有姜濤份。

《蘋果》今日打畀姜濤，對於ViuTV有意組男團預埋佢，問姜濤點睇？姜濤話:「o依家呢個圈發展個人可能好難，但我唔係百份百有信心對香港嘅男團，本身佢哋冇做過男團，希望會做好，唔好太快推出嚟，train到觀眾覺得OK先至推出嚟，因為香港男團質數好似唔係好高，所以就咁推出嚟會畀人話，寧願唔好咁快。」講到有幾間公司包括唱片公司爭住簽佢，姜濤話:「係開心嘅，即係某啲特質畀人睇中。」姜濤話自己仲有不足之處，會努力做好。

上星期《全民造星》節目中，姜濤接受口才應對訓練，娛樂主播Koey問佢有冇拍拖時，姜濤話過冇，只係試過暗戀人，之後Koey再追問佢係咪處男，姜濤勁尷尬咁笑，之後喺Koey耳邊話:「係。」19歲嘅姜濤承認自己係處男之身。不過，今日佢同《蘋果》講開當日自揭係處男一事時勁後悔講出嚟，佢話:「都唔知點解答到咁，都後悔咁樣答，自己嘅事畀人知道唔係幾好。」