華華揭開勁蝕15.37億銀嘅英皇國際（163）年報，發現佢哋嘅董事酬金大縮水，減咗63.2%，可謂共度時艱。兩位執董兼總經理黃志輝同范敏嫦嘅袍金，由截至去年3月底止的08年度分別775.5萬同606.4萬銀，到09年度剩番268.1萬同139.7萬；負責地產業務嘅執董張炳強，酬金亦減到299.7萬，比08年少咗483萬，唔通公司要佢哋為業績負責？
睇真啲，原來縮水只係冇咗啲紙上富貴，即係由購股權折算出嚟嘅股份溢價，兼同業績掛鈎嘅表現獎勵。08年度成個董事局有關支出達1774.7萬銀，佔當年嘅董事酬金總額66%，今年主要係少咗呢部份。
至於董事們真金白銀出嘅袍金、薪金同其他福利，唔單止冇減，仲加咗77萬㖭。雖然話公司蝕到嚇親人，主要係由15.86億物業減值造成，之不過毛利亦大跌六成三，咁都有人工加，公司算係咁，只係苦咗班小股東囉。

潘廸生兌現減薪承諾

講開減人工，廸生創建（113）噚日公佈嘅年報，睇到主席潘迪生董事酬金由08年度嘅1035.1萬銀，減至09年度嘅820.2萬銀，減幅20.76%，即係兌現舊年底減薪兩成嘅承諾，即時冇咗千萬年薪呢支歌仔嘞。以公司09年度純利大跌75.6%計，減薪兩成其實唔算勁囉。