黃宗澤（Bosco）最近頻頻扮女人，當然唔係有易服癖，而係佢要為邵氏網劇《飛虎極戰》男扮女裝上陣。Bosco戴晒假髮、搽到個嘴紅卜卜，雖然已經過PS修圖，但望落都好有人妖feel，早前佢話好想錫三哥苗僑偉一啖，但三哥當然唔肯就範，話見到佢已經想嘔。

今日Bosco再下一城，搵咗同劇嘅一位女工作人員，佢哋都有磨菇髮型，仲拍片一齊慢鏡頭揈頭髮，留言﹕「喺劇組搵到我個妺，仲一齊拍咗個洗頭水廣告添！」雖然咁重口味，但大部份網民睇完都話好好笑，但另一方又覺得好難頂，劉佩玥就搞笑留言﹕「你信唔信我打你吖嗱？！」