韓國男團Super Junior（SJ）前日及噚日於日本東京舉行巡迴演唱會《Super Show 7》，當中正在當兵嘅圭賢亦有到場支持，令粉絲非常驚喜。

圭賢於台下被認出時，亦有跟粉絲揮手，之後佢去後台跟一眾成員合照，隊長利特今日凌晨於Instagram公開SJ合照，而藝聲亦於Ig上載佢跟厲旭及圭賢嘅合照，表示係久違嘅小分隊「SuperJunior-K.R.Y.」合照。

圭賢噚晚亦於Twitter公開一張背影照，留言：「《Super Show 7》非常成功，成員及我哋嘅公主（粉絲）都非常開心呢，我馬上就會嚟見你哋啦。」而圭賢預計於明年5月7日退伍。

另外，有網民好奇圭賢當兵期間竟然可以出國去日本，而隊友銀赫當兵時亦曾跟家人出國旅行，當時韓國兵務廳就解釋，軍人只要按照規定於30日前申請放假，亦可以獲得假期及外出旅遊。

精選韓流，喺晒《娛果》
http://fb.com/appledailyent