當年今日
關於我們

【李八方online】明言反對變性 奇女子出選新界東:神叫我參政!

蘋果日報 2018/01/17 17:17

李八方ONLINE趙佩玉

立法會補選3月11日舉行,繼「娥姐」陳玉娥靜雞雞率先報名參選,又有奇女子登場。獲黃之鋒老豆黃偉明力撐嘅性傾向條例家校關注組成員趙佩玉亦宣布參與新東補選,佢話今次係「神叫我參政」,主要政綱就係反對設立「性別承認」制度,亦都反對性傾向條例立法。
趙佩玉話今次參選係神嘅呼召,雖然自己無錢,又收唔夠提名,不過「佢(上帝)同我講一定會成功」,「上帝早已預備」,所以自己一定可以入到立法會。佢又話之前曾經連續14日喺立法會外禁食祈禱,參選新東係跪喺立會、祈禱後嘅結果。
趙佩玉嘅參選記者會都非常別開生面,佢同支持者首先喺立法會外載歌載舞,趙又跪低祈禱,搞咗成半個鐘先至開始記者會。至於現身撐場嘅之鋒爸爸黃偉明就話支持趙嘅理念,佢自己無計劃去參選喎。