買樓好可能係小市民一生人嘅最大投資，不過有唔少買咗樓嘅人都會後悔。後悔未必係因為供樓負擔太大，或者變咗負資產，而係用幾百萬買咗層縮水樓、漏水樓，手尾長到不得了，完全唔係心目中所諗嘅安樂窩。
網友superminibb喺《香港討論區》發起「你認為邊個發展商起啲樓最好住呢？」這題目進行討論，希望同其他網友互相提點吓買咩發展商嘅樓要特別小心。
佢本人就最驚長實樓，「我住過兩間長實樓，都係有漏水問題，而家見到佢啲新盤我都唔會去睇......」。

長實華懋網友勁彈

寶貝bbbb就一次過彈晒幾間大發展商：「信和同新世界差不多衰......勁多單位入水，啲廚房同廁所設備，用三、五年就好似用咗十年咁。而誠哥嗰啲出品就更加係垃圾中的垃圾，正宗的潮州生意佬，吸錢怪獸......」。
有網友就怕講發展商個名出嚟會惹官非，唔敢用發展商真名。ac325i就係其中一個：「一定係牆光，唔畀你裝有線、PCCW，一定要你用『你事』商品，幫佢打死一世工。」至於luxxxx就話「華X」認真唔掂，「華X外形設計同質素都差，電線冇膠喉包、外牆滲水、紙皮石甩甩漏漏都唔執。」唔知「華X」係邊間？可能bluebluegirl同33366可以幫到你，因為佢哋異口同聲話華懋最唔掂喎。