【撞斃交警】車cam片主感慨:2分鐘前仲見到佢,咁就冇咗
交通警殉職錄音車Cam
一名交通警員處理交通意外時遭貨車撞斃,有司機事後將殉職警員出事前的執勤情況的車cam片段上傳至互聯網,更錄音透露當時警方截車封路的情況。她指當時自己在紅磡漆咸道北沿橋落斜,已經見到有警車在場,所以立即將車速收慢,「右手邊有架黑色私家車,佢哋(警員)就想將佢(黑色私家車)移去左邊嘅巴士站度,唔好阻住果個位」,所以將她截停。
司機續稱:「你見到被撞死嗰個差人,就喺我車Cam片出現,係左手邊拎住電筒係度照嗰個嚟,佢截停晒啲車之後就開始移車,跟住個差人就喺我左邊車行咗去我車尾方向,咁我後面都有幾架車停咗喺度。」
大約兩分鐘後,警方開始放行車輛,她憶述自己當時仍未到的蕪湖街的燈位,便聽到『嘭』一聲的巨響,「好大聲,我望後鏡見到,我心諗(有其他車)收唔切炒落架警車度,但我都仲未知死咗人」,未幾便收到上司的電話,指自己被困車龍內「塞住晒」。她立即回應稱:「我知道再撞咗車,我話(上司)電單車過唔到咩,跟住我先再睇新聞,先知撞落警車嗰下,撞到嗰個差人,跟住仲要死埋。」
她長嘆一聲後,感慨表示:「唉,2分鐘前仲見到個差人企係我車Cam前面,係度行緊過去做嘢,咁就冇咗啦。」