自從2003年由士砵亭加盟曼聯着上紅魔7號後，皇家馬德里球星基斯坦奴朗拿度（C朗）同CR7呢組代碼可謂形影不離，「一剔牌」嚟緊呢個禮拜為佢推出橙銀色新砵「Chapter Four: Forges for Greatness」，當然唔少得CR7亮相啦。不過，呢對砵嘅後踭位隱藏住「XXVIII」呢組羅馬數字暗花，各位C朗球迷又知唔知點解呢？

原來C朗當年加盟曼聯，本來諗住着番喺士砵亭着開嘅28號，點知當時領隊費格遜就話想佢接過「魔7」呢個「冧巴」，C朗話：「我當時覺得好驚訝，因為我知道有幾多偉大球員着過呢件衫。」好彩C朗嘅表現亦配得上「魔7」，媲美佐治貝斯、白賴仁笠臣、簡東拿、碧咸等前輩，佢亦表示：「呢個係我喺球壇取得成功嘅開端，我唔單止球技有改進，體格亦然。喺紅魔嘅5年歲月，我學到足球嘅藝術，亦一齊贏得好多錦標，對我而言係一場美夢。」