【要尊重同了解】支持卓林出櫃 王曼喜:每個人有自己選擇外人唔應該去批判
出櫃王敏德王曼喜Amanda S.卓林danielle
王敏德(Michael)同囡囡曼喜(Kayla)、名模Amanda S.、Danielle今日喺銅鑼灣出席「香港網球公開賽慈善名人午宴」,Michael同Kayla甚少父女檔煮嘢食,仲話依家個個大個咗,都係叫外賣多,Michael仲趁機投訴太太馬詩慧冇乜煲湯,佢哋話好想飲返Janet煲嘅湯水保健。講到最近宣佈出櫃嘅卓林,最近被指輟學後出去搵工養女友,Kayla就話佢哋唔認識,但就力撐對方話:「我唔知道故事嘅內容,每個人有自己選擇,有佢哋嘅原因,可能佢呢刻需要咁做,我哋做外人唔應該去批判。」而auntie級嘅郭秀雲就狠批卓林唔尊重媽咪吳綺莉,對此Kayla就話:「呢個係溝通上嘅一樣嘢,唔係尊唔尊重,媽咪同個女嘅關係,要成日傾偈、多啲了解大家嘅睇法,係要相方去尊重同了解,17歲話大唔大,話細唔細,希望每個屋企有問題都自己擺平,愛係好偉大,母女嘅愛係唔會畀其他嘢打敗!」
而身為3仔女嘅父親,Michael都話經歷過佢哋嘅反判期,佢嘅角色就係要指出錯誤,喺「後面」走出嚟講出自己嘅睇法,咁「前面」嘅嘢邊個做?咪係老婆Janet囉!Michael話:「我覺得細路好聽話,但係一有錯,唔聽話嘅時候,Janet就會畀壓力,會嚴厲啲,佢會講講講......我好驚!我哋係good team,到長大佢哋就決定自己路向。」
另外,Amanda漂染咗一頭白髮現身,非常有型!Amanda話好鍾意個新髮型,仲話係髮型師遊說佢染嘅,Amanda話:「我似家好似鬼妹,髮型師話我唔係超模Linda Evangelista,但係我可以做到佢嗰種成日轉變髮型而又有好靚嘅效果,出咗嚟我真係好鍾意。10年前我都好鍾意轉變髮型,呢個髮型男朋友都好鍾意,話我係新女友,有新鮮感。」Amanda話心情興奮,原因係最近多咗喺烹飪上嘅發展,嚟緊會同餅店合作外,佢又再次獲謝霆鋒嘅節目《鋒味》邀請,會去外地拍節目,不過佢就有啲擔心話:「真係好興奮,問題係我呢個髮型,唔知大陸市場接唔接受。」