自從賭波合法化之後，賽馬投注額明顯下降，在日常的場合中，人們的話題亦是講波多過講馬，但趙飛雲昨日上到股票行，居然又見到多咗人刨馬經，原來昨日馬會無波賭，而港股這兩日走勢轉趨牛皮，離場的散戶愈來愈多，唔少經紀百無聊賴惟有刨馬經。
講句真，趙飛雲今個月亦係睇多過做，出擊次數十隻手指數得出。大市雖然調整近尾聲，但目前仍未完成尋底，就算完成尋底亦會先橫行一兩個月，待大戶收集得七七八八才會大幅炒上。一句講晒，近期要在股市搵食確係唔容易。
美股周二晚作勢向上，但杜指及納指始終未能升破短期降軌，維持近日窄幅爭持，等待突破的走勢。
雖然臨近期指結算，但港股昨日走勢仍是十分牛皮，全日波幅只有102點，恒指微升10點，收12165。
國企股表現較佳，國企指數升1%，收4263。重磅成份股中，除中國人壽（2628）繼續下跌外，其他普遍有不俗反彈。不過國企股跌勢已成，短期未調整完，反覆下試50周線（現處3870）的機會相當大，要博反彈不妨稍等。如果手頭有貨，不妨考慮趁反彈減磅，國指近期較大的阻力位在4530水平，升近不破應考慮沽貨。

華能7.85元阻力大
現時國指重磅股中以華能（902）較硬淨，昨收7.55元，重返50日線（現處7.50元）之上收市，但10日線已下降至7.65元水平，20日線在7.85水平，短期反彈料受制於以上阻力區，有貨者若見升近阻力不破先減持，候回頭下試7元企穩才補回。
趙飛雲