當年喺台灣以童星出身嘅紀寶如，據台灣媒體報道，其成長故事早前被三立電視台改編成電視劇《珍珠人生》，戲中小女孩「珍珠」難以想像嘅經歷，更係紀寶如嘅真實童年，「珍珠」喺戲中被化身「紀阿嬤」嘅女演員，要求佢打「抑制生長」針、束胸等壓抑成長，令唔少台灣觀眾睇到邊喊罵鬧。

上周五《珍珠人生》劇情講「紀阿嬤」為咗讓「珍珠」繼續喺演藝圈發展，竟強逼孫女打「抑制生長針」，仲要每日幫佢束胸，令佢維持喺149公分身高及平胸嘅模樣，令觀眾直呼心痛，更令劇集創下台灣電視3.46收視率，收看人數多達129萬人。

據知，當年紀寶如係喺14歲嗰陣，被紀老太帶去私人診所，請醫師幫紀寶如喺兩腳膝蓋打「抑制生長素」，佢自14歲之後就冇再長高，更維持童音、童顏。

紀寶如都講過，現實中嘅紀阿嬤當初冇瞞著佢，有同佢講過每半個月要喺膝蓋打一針，必須持續半年，又喺女性發育時期，幫佢束胸，令佢痛到喊出嚟，甚至出現呼吸困難，不過當時仍然相信阿嬤嘅說話，直言目前除咗身高比人矮咗啲，暫時身體未有任何嚴重嘅影響。