陳瀅今晚喺君悅酒店出席腕錶品牌晚宴，佢着住件大V領嘅裙現身，有少少性感，話佢着得好隆重，陳瀅笑言：「係呀，襯番啲錶吖嘛，要優雅啲，打扮得靚啲，最近拍劇同電影，唔俾化妝，所以難得今日出嚟見大家，所以隆重啲見大家，扮吓靚。」陳瀅仲話自己黐足晒膠紙，做好安全措施，所以唔怕走光。

提到最近啲劇同電影都要素顏上陣，陳瀅話：「自己有時開live都係素顏，所以都冇乜所謂，其實皮膚好的話，素顏都係OK嘅，所以自己要好注重皮膚嘅健康。」係咪覺得自己天生麗質？陳瀅話：「唔係，其實都需要保養嘅，女仔係唔可以偷懶嘅。」

咁係咪有愛情滋潤，所以皮膚都特別靚？陳瀅話：「真係冇呀，係有男仔約嘅，會約出去睇戲食飯，o依家只係認識緊，未係追緊，暫時冇話有邊一個係好想發展嘅。」咁嚟緊會唔會約人睇煙花或者食月餅？陳瀅狂笑後答：「其實我中秋節要開工，成個禮拜都要做嘢，係有認識嘅男仔，但係冇時間去了解，因為呢半年都係工作第一位，拍完嘢先再算啦！」記者笑言叫佢翻撻就可以唔使花時間再認識新男友，陳瀅笑言：「冇冇冇，冇一齊呀！過往嘅男朋友都會keep住係好朋友。」

精選娛聞，喺晒《娛果》
http://fb.com/appledailyent