話咁快又一年，上屆港姐冠軍雷莊𠒇（Juliette）卸任在即，雖然呢一年佢都有履行港姐嘅工作聽教聽話，不過唔見得佢喺大台有好發展，所以佢卸任後決定返加拿大。依家，人已在加國喇。

工作唔多，但呢位唔算靚，又有醫生男友嘅港姐冠軍，偏偏桃花旺。早前本報就喺佢出發前，見到佢約會四眼男食晏，兩人有講有笑好好傾，離開時四眼男一度想拉住佢隻手添。

繼6月初Juliette被影到同外籍男喺酒店約會，話係約咗一班舊同學去飲嘢。日前中午時份，見到佢又同四眼男約會。嗰日佢獨自由北角寓所出發去中環，最初佢去咗安蘭街一幢大廈，裡面有間武術館，本身有學吓功夫同打拳嘅佢，可能上去學嘢，但逗留咗半個鐘就走。

之後佢去咗隔離街，行到一間多人排隊嘅越南餐廳門外，會合一位一早嚟排隊嘅四眼男。兩個一見面就雞啄唔斷，期間Juliette仲手舞足蹈，表情誇張，仲擘大口咁講嘢，真情流露。

等咗冇耐，入到食肆，因為食晏時間人多，兩個要逼住坐，不過人雖然多，但根本冇人認得坐响度食嘢嘅係港姐冠軍Juliette。而佢亦好enjoy同四眼男傾偈，到有嘢食嚟度，佢都係相機食先，用電話影番張相。兩個食咗一粒鐘到，離開時，因為舖外係嘅行人路有樓梯級，所以四眼男欲伸手去扶住佢左手踭，但Juliette行得快，四眼男根本捉唔到佢，相信四眼男趕住返工，陪Juliette行咗冇耐就走人，今次呢位四眼男，又唔知佢位喺加拿大做醫生嘅男友，又識唔識呢？

之後Juliette一個人再去咗附近一間跳舞中心，又練功夫又練舞，之前佢講過話加拿大嗰邊有工作等緊佢，仲話荷李活好需要中國面孔嘅動作演員，睇嚟佢真係為返加拿大發展做定準備。

精選娛聞，喺晒《娛果》
http://fb.com/appledailyent