當年今日
關於我們

ipork點擊︰白色恐怖 - 陶傑

蘋果日報 2020/09/03 14:22


吮舉埋位在即,白色恐怖越來越猛,賭王終於挺身而出,公開警告吮委:切勿投白票玩恐怖,白票兇徒身份,阿公實會知,點樣知,就唔話你知!
賭王講得冇錯!因為投票不記名呢隻機制,係前肥彭英殖民地遺留嘅特大炸彈,違反小農社會「明人不做暗事」、「士大夫行不改名坐不改姓」嘅武俠國情,目的就係挑動猜忌,製造分化,搞到喺表面上,個個都咁好女色,不過暗中你估我係咪基,我又估你係咪Bi,八百吮委,個個戴住張人皮面具,玩E個酒池肉林嘅集體狂歡遊戲,就存在大量吮而不舉,或者明明個樣係吮,實質出陰力用棚牙嚙咬,搞到個候選人「哎吔」一聲痛叫嘅陰毒空間!
唔怪得賭王目光如炬,喺澳門呢個冰火大骨場出入,又做開賭場,知道人心險惡,昅慣啲老千點樣Teamup,你摸摸個鼻,我摸摸耳仔嗰類出千暗號,予以及時作出獅子吼,希望可以幫到大局喇!
將吮票編號跟冧巴,亦係一個辦法!吮舉法例,講明不記名啫,不過冇講不編號喎!喺赤柱監獄,啲監犯無名無姓,連葉繼歡咁鼎鼎大名個編號都係「三四二六」,有冧巴嗌,阿公心知邊個打邊個,就唔怕你監犯大暴動嘞!
不過,雖然唔可以低估一個民族嘅奴性,但同時,在唔可以低估佢嘅賊性喎!萬一各股暗流,靜靜雞滙合,本住「八月十五殺韃子」之心,公開預告,啲冧巴票齊齊互相大撈亂,三四二六嘅,就填二七三八嗰張飛,一三六九嘅,就同六七一二交換,好似鬼佬集體換妻咁,又點樣搵奸呢?E個問題,阿公就要諗諗佢嘞!