當年今日

抵食舖:$10碟激抵日本菜 教埋你揀

蘋果日報 2006/07/25 00:00


因乜登兩張一模一樣嘅相呀?睇真啲吖唔該,有唔同㗎,今日就同大家玩Photo-Hunt,兩張相有10個不同之處,畀埋貼士你,右面幅相多咗10個金銀膶,10個金銀膶代表10碟超抵食日本菜。點抵法?明碼實價每碟$10,成枱大碟小碟1張紅衫魚搞掂,夠抵未?
記者:黃若茵 攝影:楊錦文
模特兒:Hibernia(Salvador)
empty
empty
大量入貨拉上補下
「浜」所有菜式碟碟$10,大廚話:「秋刀魚、翡翠螺同價格比較浮動嘅肉食點都要蝕少少,不過蝕唔入肉,因為老闆識得大量入貨。好似秋刀魚咁,每次起碼入200條,一日清貨,大量入貨價錢平番啲,有數為,拉上補下自然有得賺。」老闆搭嗲:「尖沙嘴人流高,多中高檔餐廳,但唔少人會專揀平價嘅嘢食,$10碟,喺尖嘴我估只此我一間。」係咪只此一間我唔敢講,不過餐廳選址亞士厘道,長方形地庫舖位,環境優雅,裝修老實就大路咗啲,但勝在枱與枱之間夠闊落,無話櫈背撞櫈背,坐得尚算舒服。
靚女提供售後服務
影相當日下午三點幾,全場冷清小貓三四隻,我問:「點解咁少人嘅?」劉經理話:「話晒商業區,殺完Lunch點都會靜一靜,到晚市又爆場㗎嘞,雖然啱啱開業,但我哋都儲到唔少熟客喇。」影完相閃,傍晚六點半折返做食客訪問,咦?無吹水喎,門口企滿人,起碼要等半個鐘先有位,門口仲企咗位靚女C.C.㖭。C.C.可以話係「浜」嘅親善大使,佢話:「老闆好睇重回頭客,專登請我番嚟負責售後服務,我要定期打電話同客人傾偈,問佢哋對餐廳有乜意見,當然唔少得Sell吓餐廳最新出品喇,唔少客都會返轉頭幫襯。」佢大方夠索,Keep熟客易如反掌,我唔係仔咋,如果係我一定攞佢手提電話啫。
empty
C.C.■「經常打畀熟客好有用㗎,起碼佢哋諗唔到食乜嗰陣會諗起嚟呢度食。」
10大最抵必食
1.鍋物:合鴨鍋
無錯牛肉鍋最啱香港人口味,但畀我揀就寧願要呢個合鴨鍋喇。諗真啲,所謂牛肉鍋都不過幾塊肥牛啫,鴨肉質唔差得過牛肉,難怪模特兒Hibernia都話:「呢個鍋最抵!雖然好多都係菜,但$10咁大鍋,無得彈呀。」
empty
2.揚物:吉列生蠔
某壽司連鎖店一客吉列生蠔夠膽死收$50,今次$10咁平,點我都要叫番碟,外面炸得脆卜卜,入面充斥生蠔肉汁,唔錯喎。
empty
3.爐端燒:鹽燒秋刀魚
𠵱家秋刀魚未至於最當造最肥美,不過算大條多肉,$10碟咪咁挑剔,食嗰陣記得淋檸檬汁,燒過嘅魚肉會更惹味香口。
empty
4.刺身:翡翠螺
刺身之中我偏愛螺肉,因為肉質爽甜,亦唔似三文魚咁膩口。
empty
5.卷物:軟殼蟹卷
一份兩件,軟殼蟹炸得香脆,有大量蟹子鋪面,份量多,我畀80分。
empty
6.一品料理:紅酒薯仔煮牛尾
牛尾用紅酒醃過再燜兩粒鐘,紅酒味比較淡,好彩牛尾肉質好,加分。
empty
7.壽司:煙鴨胸壽司
食壽司我寧願揀鴨胸,鴨胸肉好大件,入口OK滑,我建議咪點太多Wasabi,太多Wasabi盞冚晒肉味。
empty
8.飯:鰻魚炒飯
鰻魚雖然切至細細粒,但每啖飯都有三四粒,想食得飽肚嗌個無衰。
empty
9.拉麵:叉燒拉麵
豬骨湯底味道夠濃,叉燒味道就一般啲,算是不過不失,唯一缺點係份量太少,但有好味豬骨湯補數,我飲晒落肚一滴無嘥。
empty
10.意粉:菠菜汁煙三文魚碎意粉
放心,絕對唔會用做刺身或壽司切剩嘅三文魚頭頭尾尾做呢道菜,抵。
empty
食客有Say:個個都話抵!
empty
梅小姐:「第二次嚟喇,上次食Lunch好多人,$10碟好抵食。」
empty
Ada:「其他日本餐廳都比呢度貴好多,呢度就平得嚟有質素。」
empty
吳先生:「叫咗14碟,好味又食得飽,下次一定再嚟。」
empty
廖小姐:「第一次嚟㗎咋,$10碟俾個價錢吸引咗,份量都OK吖。」
搵食攻略
浜$10之專食店(23751232)
地址:尖沙嘴亞士厘道24-38號天星大廈地庫
營業時間:星期一至日11:30am-11:30pm
交通:尖沙嘴地鐵站A1出口
座位:150個,晚市必爆,記得訂位
人均消費:午市$50,晚市$100
最好賣:鍋物,日賣200多份